“Ipa-Cash ang Trash”, ito ang panawagan ng General Santos City Waste Management Board sa gaganaping Recyclable Waste Fair sabay sa pagdiriwang ng International Earth Day ngayong April 22,2009 sa Gaisano Mall of Gensan.
Matatandaan na noong nakaraang taon naging sentro din ng selebrasyon ang nasabing fair kung saan tinipon ang lahat ng junkshops upang mamili ng recyclable na basura mula sa ibat-ibang establishment, tahanan at indibidwal sa syudad.
Ito ay upang maipalaganap sa lahat ng mamamayan ng lungsod ang mga bagay na binibili ng mga junkshops at ang Sustainable Waste Management Program. Kaya naman ngayong taon ang parehong kaganapan ulit ang gagawin upang mas lalong paigtingin ang kampanya ng lungsod sa tamang pagtatapon ng basura.
Noong unang lingo ng Marso matatandaang pinangunahan din nina US Ambassador Kristy Kenny, Congresswoman Darlene Antonino Custodio, at City Mayor Pedro B. Acharon,Jr. ang paglulunsad ng Kampanya Kontra Basura ng syudad at barangay Lagao.
Ang tema ng nasabing programa ay “Para sa Kalinisan, Kalusugan at Kagandahan ng Gensan, Tayo’y Magtulugan” kung saan naging kaagapay ng lungsod ang USAID sa paglulunsad nito.
Kaya naman kasabay nito ang pakontest para sa pagbibigay ng pangalan ng mascot para sa programang ito ay binuksan at sa darating Recyclable Waste Fair ay makakasama ang nasabing mascot. Ang mananalo ay makakatanggap ng limang libong peso.
Ngayon pa lang ay masusi ng pinaghahandaan ng GSCWM Board ang nalalapit ng pagtitipon upang muling makamtan ang adhikain ng programa. Patuloy pa ring hinihimok ang lahat ng residente ng syudad at ang business sector na makilahok sa hakbanging ito.
Ang mga business establishment ay hinihiling na magsabit ng banners upang ipakita ang kanilang suporta sa programa. Umaasa ang GSCWM board sa patuloy na suporta ng bawat general upang maabot ang adhikain ang syudad ay tunay na isang Magandang Gensan. CPIO – ALJV 03/27/09
No comments:
Post a Comment